百分百漫畫迷

睇了 my name is 邦，訪問劉雲傑，
原來當年係許景琛搵劉雲傑開始做主筆，
自此先有百分百感覺的誕生。

好記得當年我係個超級漫畫迷，
由許景琛的街霸2開始，由玉黃朝追到天行社。

街霸系列真係香港漫畫歷史上好經典的一套，
許景琛加李中興係最強的創作組合。

街霸系列的漫畫及兵器依然保存得好好，
對我的影響亦都好大，好多好好的童年回憶。

小學的時候無論去到邊都會帶住鉛筆及A4紙，
畫的都係街霸，熱愛街霸的程度係百分百，
所有有關街霸的東西都要買，一定要擁有。

去書展排幾個鐘頭買手辦；
去鑽石山許景琛簽名會，仲開心過見到大明星；
去信和後樓梯排隊等買7色封面特別版；
去北角經過玉黃朝總壇外牆，憧憬大個如果入到玉黃朝就好；
以上回憶都好深刻，相信係一世難忘的片段。

最深刻係好細個的時候，我估得小二左右，
畫了一張街霸叫阿媽投稿去每期尾頁的讀者投稿區，
結果真係登了出來，那次相信係小學階段最開心的一日。

之後好想搵返那一期的街霸，
可是依然下落不明。